मेलबर्नमा पण्डित पोखरेलव्दारा प्रवचन हुने सप्ताहब्यापी महापुराणको व्यवस्थापनको शुभारम्भ !

सामुदायिक केन्द्र मेलबर्नमा लुम्बिनीको माटो र वुद्धको मूर्ति सजाएर राखिने !

सानु घिमिरे, मेलबोर्न अस्ट्रेलिया, २०७४ कात्तिक १३ । आफ्नो कला, संस्कृति, रीति, रिवाजलाई आफ्नो पुस्तामा कायम राख्दै भावी पुस्तामा समेत यस्लाई निरन्तरता दिनका खातिर अष्ट्रेलियाको भिक्टोरिया राज्यमा बसोबास गर्ने नेपालीहरुको साझा घर सामुदायिक केन्द्र निर्माण कार्यलाई तिब्रता दिईएको छ ।

यसै अभिप्रायले आगामी डिसेम्बर १८ देखि २४ सम्म वाचन प्रबिण पण्डित दीनबन्धु पोखरेलव्दारा वाचन हुने सप्ताहब्यापी महापुराण एवं आध्यात्मिक महोत्सव ब्यबस्थापन कार्यको अस्ट्रेलियन नेप्लिज मल्टिकल्चरल सेन्टरका अध्यक्ष डा चन्द्र पोखरेल र संस्थापक अध्यक्ष रन्जन बैद्यले संयुक्त रुपमा रिबन काटेर औपचारिक रुपमा शुभारम्भ गरेका छन्।

त्यस्को लगत्तै ९ बर्षीया प्रबृति गौतमले अनपेक्षित रुपमा सबैलाई आश्चर्य चकित तुल्याउँदै करीब अढाइ मिनेट पुरै संस्कृतमा कार्यक्रम सफलताको लागि आशीर्बचन पाठ गरिन।

मेलबर्नमा नेपाली आस्था र पहिचान कायम गर्न पशुपतिनाथ मन्दिर र बौद्ध स्तुपा सहितको वहुसाँस्कृतिक केन्द्र बनाउने कार्यको लागि आबश्यक पर्ने कोष संकलन अभियानको लागि बिशेष सहायक मानिने यस महापुराण कार्यक्रमलाई ब्यबस्थित र सफल तुल्याउन क्षेत्रीय संयोजकहरु सहितको ५०१ सदस्यीय ब्यबस्थापन समिति गठन गरिएको छ ।

यो परियोजनाको लागि लुम्बिनी(कपिलवस्तु दिवस विश्व अभियानका तर्फबाट लुम्बिनीको माटो प्रदान गरिने प्रतिबद्धता अनुरुप प्रो डा कबिताराम श्रेष्ठले लुम्बिनीको माटो वेलायत लग्नु भएकोले अभियानका विश्व संयोजक रामकुमार श्रेष्ठ अभियानको कामको सिलसिलामा युरोप भ्रमणमा जाँदा लुम्बिनीको माटोबाट वेलायत निवासी कृष्ण दर्लामीले गोलाकार बृत्तभित्र वुद्धका दुई पाइतालाको आकार दिएर बनाएको सामग्री वेलायतबाट ल्याइ केन्द्रका अध्यक्ष डा चन्द्र पोखरेल र संस्थापक अध्यक्ष रन्जन बैद्यलाई संयुक्त रुपमा हस्तान्तरण गसरएको थियो ।

स्मरणीयछ, अभियानका विश्व सल्लाहाकार प्रो डा कबिताराम श्रेष्ठ, गोरखापत्रका पूर्व संपादक एबं लुम्बिनी विश्वबिद्यालयका पहिलो रजिस्टार एबं अभियानका सार्क सल्लाहकार केदार शाक्य, अभियानका नेपाल च्याप्टरका कोषाध्यक्ष धर्म बहादुर शाक्य, अभियानका नेपाल च्याप्टरका सचिब निलेश अधिकारी लगायतका टिम लुम्बिनी गएको बेला लुम्बिनीका भिक्षु टुण्डुकले विश्व शान्तिका प्रतिक वुद्ध जन्मस्थल लुम्बिनीको पवित्र माटो अभियानका विश्व सल्लाहकार प्रो डा कबिताराम श्रेष्ठलाई गत मार्चमा बिधिवत हस्तान्तरण गरेका थिए ।

वुद्ध जन्मस्थल नेपालको लुम्बिनीको उक्त पवित्र माटोबाट बनाइएको सो सामग्री मेलबर्नमा निर्माण गरिने सो केन्द्रको बिशेष शोकेसमा वुद्ध नेपालको लुम्बिनीमा जन्मिएको जानकारी सहित सजाएर राख्ने ब्यबस्था गरिनेछ ।

विश्व संयोजक श्रेष्ठले अभियानले सामुदायिक केन्द्रलाई प्रदान गर्ने निर्णय गरिएको सुनको जलप सहितको तीन फिट अग्लो करीब ५२ केजी तौलको बुद्धको मूर्ति नेपालबाट यथाशीघ्र अस्ट्रेलिया ल्याउन पनि आग्रह गरे ।

स्मरण रहोस, ३० डिसेम्बर, २०१५ मा अभियानको सातौं बार्षिकी मनाउने क्रममा अभियानका तर्फबाट संयोजक श्रेष्ठले सात देशका राष्ट्रपति र प्रधानमन्त्रीहरुलाई ती देशका पाठ्य पुस्तकमा वुद्धको जन्मस्थल बिषयमा भएको गल्ती सच्याउन लेखिएको छस् पेज लामो अनुसन्धनात्मक प्रतिबेदन कार्यक्रमका प्रमुख अतिथी पूर्व प्रधानमन्त्री पुष्पकमल दाहाल प्रचण्ड मार्फत नेपाल सरकारलाई हस्तान्तरण गरेकै बेला उक्त मूर्ति पनि नेपाल सरकारका तर्फबाट अस्ट्रेलिया पठाउने ब्यबस्था गरिदिन नेपाल सरकारलाई प्रमुख अतिथि मार्फत आग्रह गरिएको थियो । उक्त वुद्धको मूर्तिलाई पनि सामुदायिक केन्द्रको बिशेष शोकेसमा वुद्ध नेपालको लुम्बिनीमा जन्मनु भएको जानकारी सहित सजाएर राख्ने ब्यबस्था गरिनेछ ।

उक्त कार्यक्रममा श्रीमती दिल माया श्रेष्ठले कार्यक्रम सफलताको कामना गर्दै सप्ताहब्यापी महापुराणमा लाख बत्ति बाल्ने घोषणा पनि गरेकी थिईन् ।

फेसबुकमार्फत कमेन्ट गर्नुहोस !