महेन्द्र केसी, पर्वत २०७३ फागुन २१ । पर्वत सदरमुकाम कुस्मा बजारमा केहि दिन पहिले सम्पन्न भएको पश्चिमान्चल औद्योगिक मेला तथा पर्वत महोत्सवलाई लिएर आम जनमानसमा व्यापक टीका टिप्पणी चलिरहेकै मौकामा जिल्लामा रहेको रेडियो दिदीबहिनीले नवौँ महिला महोत्सवको आयोजना गर्न गैरहेको छ । रेडियो दिदीबहिनीले वर्षमा दुई महोत्सव आयोजना गर्ने सामथ्र्य राख्दछ । यो काम यहाँका कुनै पनि नीजि तथा सरकारी कार्यालयले गर्न सक्ने विषय पनि हैन र सक्दैनन् पनि । तर महिला महोत्सव पर्वत महोत्सव जस्तो गन्हाउन भएन । हिसाब पारदर्शी, महोत्सव सभ्य र शान्तपूर्ण रहनु प-यो ।
जिल्लामा संचालन भएको रडियो दिदीबहिनीले हरेक बर्ष २ पटक महिला महोत्सवको आयोजना गरी आफूलाई निजी तथा सरकारी क्षेत्रहरुको भन्दा उपल्लो स्थानमा राखेको पक्कै हो तर ,दिदीबहिनीले महोत्सवको आयोजना गरिरहदाँ भने केहि सबालहरुले आयोजकसँग जवाफ मागिरहेका छन् ।
हरेक बर्ष तीजको अबसर र अन्तराष्ट्रिय महिला दिवसको अबसर पारी आयोजना गर्ने महोत्सवमा आर्थिक पारदर्शीताको सबाल बर्षेनी उठ्ने गरेको छ । आयोजक रेडियो दिदीबहिनीले हरेक बर्ष २ वटा महोत्सवको आयोजना गर्नेगर्छ तर ती महोत्सवको आर्थिक पारदर्शीता भने देखिएकोे छैन र पाइदैन यसले गर्दा पनि महोत्सवप्रतिको जनगुनासो विगतदेखिनै छ । महोत्सवको लागि रेडियोले सरकारी विज्ञापन ल्याउन पनि सफल हुन्छ ।
भर्खरमात्रै सम्पन्न पाँचौ पर्वत महोत्सवको मुख्य प्रायोजक होस् वा सहप्रयोजकको रुपमा आयोजकले सरकारी विज्ञापनदाता खोज्न र ल्याउन सकेन तर दिदीबहिनीले आफूलाई त्यो महोत्सव भन्दा माथिल्लो र सरकारी क्षेत्रबाट समेत समर्थन भएको महोत्सवका रुपमा चिनाउन समेत सफल भएको छ । बर्षको दुइचोटी महिलाहरुलाई जमघट गराई महिला अधिकारको कुरामा पोख्त रहदै आएको महिला तथा रेडियो दिदीबहिनीको महोत्सव सवै कुरामा ठिक भएता पनि आर्थिक पारदर्शीतामा भने गम्भीर प्रश्न उठाउन बाध्य तुल्याउँदै आएको छ ।
महोत्सव आयोजना गर्दा लाग्ने खर्चको अनुमान सहित र महोत्सवको उदेश्यसहित प्रचारप्रसार गरिन्छ । अनुमानित खर्चको विवतरण आउँछ तर महोत्सव समापन पश्चायत् भने महोत्सवमा कति खर्च र आम्दानी भयो त्यो कहिल्यै आउँदै जसले गर्दा पनि महोत्सवमाथि कालो नियत वा महिलाको नाममा शोषणा भएको आम जनमानसको गुनासो रहदै आएको छ । नवौं पश्चिमाञ्चल महिला महोत्सव तथा रेडियो दिदीबहिनीको बार्षिक उत्सव यहि फागुनको २४ गते उपराष्ट्रपति नन्दबहादुर पुनले उद्घाटन गर्ने भएका छन् । यस महोत्सवमा ३० लाखको खर्च हुने अनुमान गरिएको छ ।
महोत्सवले जिल्लाको पर्यटन क्षेत्रको विकास गर्ने मुख्य उदेश्य लिएको छ भने महिला, अनाथ, अपाङ्ग, जेष्ठ नागरिकलाई सम्मान गर्ने काम समेत गर्ने भएको छ । लघुउद्यमको विकासका साथै स्थानीय उत्पादन भएका बस्तुको प्रर्वद्धनमा समेत टेवा पुग्ने आशा र विश्वास लिइएको छ । महोत्सबमा महिला शसक्तिकरणका विषयलाई समेत शसक्त बनाउने उदेश्यका साथ अन्तिम चरणमा पुगेको छ । महोत्सव समापन भएलगत्तै यो पटक आम जिल्लाबासिको मनमा उत्पन्न भएको रेडियो दिदीबहिनीले महोत्सव संचालन गरेर कति खर्च र आम्दानी भयो त्यो देखाउँदै , आर्थिक पारदर्शीता छैन भन्नेहरुको लागि भने गतिलो जवाफ दिनसक्नुनै महिला महोत्सवको मुख्य सफलता हुनेछ । आर्थिक रुपमा महोत्सव सफल होला या नहोला तर बास्तविक महोत्सवको आयव्ययको बारेमा आयोजक रेडियो दिदीबहिनीले यस पटक भने महोत्सवको नाममा महिला शोषणा भयो भन्नेहरुलाई आयव्यय सार्वजनिक गरी रेडियो दिदीबहिनीले हरेक बर्ष २ पटक महोत्सव संचालन मात्रै हैन, महोत्सव सम्पन्न पछि भएको आयव्यय पनि यथाशिघ्र देखाउन सक्छ भन्ने कुराको अनुभूति दिलाउन सक्नुपर्छ ।
रेडियो दिदीबहिनीकी अध्यक्ष स्वयं एक जिम्मेवार र जनप्रतिनिधित्व गर्ने महिला भएको हिसाबले पनि यसपाली भने हरेक कुराको सूचना प्रवाह हुनेछ र आर्थिक रुपमा पनि पारदर्शीता हुनेछ भन्नेमा विश्ववास गरौं । महिला महोत्सव सभ्य र भव्यताका साथ सम्पन्न होस शुभकामना ।
