कमल पौडेल, खर्वाङ २०७६ जेठ १० । बडीगाड गाउँपालिका भित्रका आधारभुत तथा माध्यमिक तहका शिक्षकहरुको लागी ५ दिने सुचना सञ्चार, तथा प्रविधि सम्बन्धि आधारभूत तालिम खर्वाङमा सुरु भएको छ । बडीगाड गाउँपालिका शिक्षा शाखाको आयोजनामा सो तालिम सुरु भएको हो ।
तालिमको उद्घाटन गर्दै बडीगाड गाउँपालिकाका अध्यक्ष मेहरसिंह पाइजाले शिक्षक दौडिदा मात्रै विद्यार्थी हिँड्न सक्ने भएकोले समयनिष्ठ, कर्तव्य निष्ठ हुन र लगनशिल हुन शिक्षकहरुलाई आग्रह गरे । सिप सिक्न चाहने र प्रविधि प्रयोग गर्न चाहने विद्यालय, शिक्षकहरुलाई गाउँपालिका सहयोग गर्न तयार रहेको भन्दै अध्यक्ष पाईजाले सिकेको सिपलाई कक्षाकोठामा लागूगर्न आग्रह समेत गरे ।
कार्यक्रममा शिक्षा अधिकृत कृष्णराज रेग्मीले कक्षा कोठामा सिकाई प्रभावकारी गराउन आइसिटिको प्रयोग जरुरी रहेको बताए ।
उद्घाटन कार्यक्रम त्रिभुवन नमुना मावि खर्वाङका प्रधानाध्यापक ढालमणि भण्डारीको अध्यक्षता तथा शिक्षक कमल पौडेलको सञ्चालनमा सम्पन्न भएको थियो। तालिममा बडिगाड गाउँपालिका भित्रका २४ जना शिक्षकको सहभागिता रहेको छ।
