मुसिकोट र तिलोत्तमा नगरपालिका वीच भगिनी सम्वन्ध : कृष्ण र सुदामाको जस्तो हुने विश्वास !

कमल पौडेल, वामीटक्सार गुल्मी २०७६ फागुन ८ । गुल्मीको मुसिकोट नगरपालिका र रुपन्देहिको तिलत्तोमा नगरपालिका विच भगिनी सम्बन्ध कायम भएको छ । बुधवार मुसिकोट नगरपालिकाको सभाहल वामीटक्सारमा तिलत्तोमा नगरपालिकाका नगरप्रमुख बासुदेव घिमिरे र मुसिकोट नगरपालिकाका नगरप्रमुख सोमनाथ सापकोटाले ७ बुँदे भगिनी सम्बन्ध सम्वन्धि सम्झौतामा हस्ताक्षर गरेपछि सो सम्बन्ध कायम भएको हो।

सो कार्यक्रममा बोल्दै तिलत्तोमा नगरपालिकाका प्रमुख बासुदेव घिमिरेले दुई पालिका विचको सम्बन्ध गाँउ र वेशीको रुपमा रहने बताए । तिलत्तोमालाई आवश्यक पर्ने श्रोत मुसिकोटमा र मुसिकोटलाई आवश्यक पर्ने श्रोत तिलत्तोमामा हुन सक्ने भन्दै उत्पादन वजारीकरण गर्न, अनुभव आदान, प्रदान गर्न यो सम्बन्धले सहयोग पुर्याउने बताए ।

त्यस्तै मुसिकोट नगरपालिकाका प्रमुख सोमनाथ सापकोटाले तिलत्तोमा जनसंख्या र आर्थिक अवस्थामा धेरै ठुलो रहेको, मुसिकोट सानो रहेको तर सम्बन्ध सत्ययुगका कृष्ण र सुदामाको जस्तो हुने बताए । लुम्बिनीलाई ढोरपाटन र मुक्तिनाथ संग जोड्ने त्यसको ट्रान्जिट मुसिकोटलाई बनाउनुपर्ने भन्दै नगरप्रमुख सापकोटाले मुसिकोटको शितलता र तिलत्तोमाको न्यानोले दुवै नगरपालिका अगाडी वढाउन सहयोग पुर्याउने विश्वास व्यक्त गरे ।

कार्यक्रममा तिलत्तोमा नगरपालिकाका उपप्रमुख जगेश्वरी देवी चौधरी, नेपाल कम्युनिष्ट पार्टी नेकपाका रुपन्देही जिल्ला सदस्य तथा नगरकमिटि सचिव लक्ष्मण खनाल, नेकपाका मुसिकोट नगरकमिटि इन्चार्ज जीवन खरेल, नेपाली काग्रेसका मुसिकोट प्रमुख झविलाल भण्डारी लगाएतले शुभकामना मन्तव्य व्यक्त गरेका थिए ।

कार्यक्रममा मुसिकोट नगरपालिका वडा नं. ८ का अध्यक्ष नारायण प्रसाद सापकोटाले मुसिकोट नगरपालिकाको परिचय सहित हाल सम्म गरेको कार्यप्रगतिको जानकारी गराएका थिए भने तिलत्तोमा नगरपालिकाको तर्फवाट प्रवक्ता सुरेन्द्र श्रीले नगरपालिकाको जानकारी सहित कार्यप्रगति प्रस्तुत गरेका थिए

त्यस्तै कार्यक्रममा तिलत्तोमा नगरपालिकाका प्रमुख प्रसासकीय अधिकृत माधव प्रसाद शर्माले कार्यक्रमको औचित्यमाथि प्रकाश पारेका थिए ।

कार्यक्रम मुसिकोट नगरपालिकाका प्रमुख सोमनाथ सापकोटाको अध्यक्षता, उपप्रमुख कमला शर्माको स्वागत मन्तव्य तथा प्रमुख प्रशासकीय अधिकृत नवराज भण्डारीको सञ्चालनमा सम्पन्न भएको थियो।

सो कार्यक्रममा दुवै नगरपालिकाका कार्यपालिका पदाधिकारी तथा सदस्यहरु, राजनैतिक दलका प्रतिनिधि, कर्मचारी, पत्रकार लगाएतको सहभागिता रहेको थियो।

फेसबुकमार्फत कमेन्ट गर्नुहोस !