दमेकमा पहिरोले पुरिदा एक जना गम्भीर घाइते, बिद्यालय बगायो, गाजाको दह जोखिममा !

लक्ष्मण बिश्वकर्मा, बागलुङ (कुस्मिसेरा) २०७७ साउन २९ । जैमिनी नगरपालिका वडा नं. ३ दमेक नौलामा पहिरोले देव बहादुर छन्त्यालको घर पुरिदा उनका छोरा प्रेम बहादुर छन्त्याल गम्भीर घाइते भएको वडा सदस्य भैर बहादुर छन्त्यालले जानकारी दिए । घाइतेलाई उपचारका लागि धौलागिरी अस्पताल बागलुङ पठाइएको उनले बताए ।
आज बिहान एक्कासि घर माथिबाट ठुलो पहिरो आएर घर पुरिदा सुतिरहेका छन्त्याललाई पहिरोले अँठाएको हो । परिवारका अन्य सदस्य अर्को घरमा सुतेका कारण जोगिएका छ्न ।

पहिरोले घर पुर्ण रुपले पुरेको र गोठमा रहेका एउटा बिहाउने भैसी, पाडा र तीन ओटा बाख्रा पनि पुरेको छ । पहिरो स्थलमा बरेङबाट प्रहरी आएर मुचुल्का उठाएको र स्थानीयद्वारा पहिरो पन्छाउने काम भैरहेको वडा सदस्य छन्त्यालले बताए ।

उक्त स्थानका जित बहादुर छन्त्याल, रेशम बहादुर छन्त्याल, राम बहादुर छन्त्याल, सशिकला छन्त्याल, इन्द्र बहादुर पुन, थक बहादुर पुन,बिरेन्द्र पुन र बोम बहादुर काललको घर पहिरोको उच्च जोखिममा परेका हुन । त्यस्तै उक्त ठाउँमा रहेको लक्ष्मी प्राथमिक बिद्यालय पनि पहिरोले पुरेको छन्त्यालले बताए । गाजाको दह नजिकै ठुलो पहिरो गएकाले ताल पनि उच्च जोखिममा परेको छ ।

फेसबुकमार्फत कमेन्ट गर्नुहोस !