बागलुङ, २०७४ साउन ६ । आदर्श सञ्चार सहकारी संस्था लिमिटेड बागलुङले आफ्ना शेयर सदस्यका परिवारका सदस्यको निधनमा श्रद्धाञ्जली सभाको आयोजना गरी मृत्यु राहत रकम हस्तान्तरण गरेको छ ।
बागलुङ नगरपालिका वडा नं. ३ कम्पुटोल निवासी संस्थाका शेयर सदस्य तथा शिक्षा उपसमितिका सदस्य हिमालय प्रकाश श्रेष्ठकी आमा नन्द कुमारी श्रेष्ठको निधनप्रति दुख व्यक्त गर्दै संस्थाले श्रद्धाञ्जली सभा सम्पन्न गरेको हो ।
संस्थाले १२ औं पूण्य तिथि पारेर दिवंगत आत्माको चिर शान्तिको कामना गर्दै श्रद्धाञ्जली सभा एवम् राहत रकम हस्तान्तरण गरेको हो ।
हरेक दिन एक जना शेयर सदस्यबाट एक रुपैँया संकलन गरी बनाएको राहत कोषबाट संस्थाले विपत तथा दुःख पर्दा शेयर सदस्यका परिवारलाई सहयोग गर्दै आइरहेको संस्थाका उपाध्यक्ष अञ्जु जिसीले जानकारी दिए ।
संस्थाका शेयर सदस्यको निधनमा १५ हजार र शेयर सदस्यका परिवारका सदस्यको निधन हुँदा ५ हजार राहत प्रदान गर्दै आएको संस्थाले जनाएको छ ।
संस्थाका उपाध्यक्ष अञ्जु जिसी, सचिव प्रेम लामिछाने, कोषाध्यक्ष अनन्तबहादुर खड्का, लेखा संयोजक मिलन केसी, सञ्चालक शान्ति श्रेष्ठले स्वर्गीय नन्दकुमारी श्रेष्ठकी छोरी चयनदेवी श्रेष्ठलाई सहयोग रकम हस्तान्तरण गरेका थिए ।
परिवारका तर्फबाट स्वर्गीय श्रेष्ठको जीवनीका बारेमा छोरी चयनदेवीले जानकारी गराएकी थिईन् ।
आदर्श सञ्चार सहकारी संस्थाका उपाध्यक्ष अञ्जु जिसीको अध्यक्षतामा भएको श्रद्धाञ्जली कार्यक्रममा संस्थाका संस्थापक अध्यक्ष मनकुमारी केसी र सांसद नरबहादुर थापाले शोक व्यक्त गर्दै स्वर्गीय श्रेष्ठले समाज रुपान्तरणमा गरेको योगदानका चर्चा गरेकी थिईन ।
श्रद्धाञ्जली कार्यक्रमको सञ्चालन आदर्श सञ्चार सहकारी संस्थाका सम्पादक रामबहादुर जिसीले गरेका थिए ।
स्वर्गीय श्रेष्ठका ७ भाई छोरा र २ बहिनी छोरी रहेका छन् ।
