सन्तोष क्षत्री, पर्वत २०७६ बैशाख १९ । घाटीको क्यान्सरबाट पीडित भएका कुश्मा नगरपालिका–३ दुर्लुङ निवासी ३५ वर्षीय हरि गिरीको परिवारलाई पर्वत समाज कतारले बिहीबार एक कार्यक्रमको आयोजना गरेर राहत हस्तान्तरण गरेको छ । आर्थिक अवस्था कमजोर भएका गिरी परिवारको पालन पोषणको लागि ४ महिना पहिले कतार गएका थिए ।
रोजगारीको लागि कतार पुगेको २ महिनामै घाटीको क्यान्सरबाट पीडित बनेका गिरीको अल तैमोज क्लिनि· कम्पनीले हाल सम्मको उपचार खर्च व्यहोरेको र आगामी दिनमा पनि उपचार खर्च व्यहोरने प्रतिवद्धता जाहेर गरेको भएपनि गिरीले काम गर्न नसक्दा नेपालमा रहेका उनका परिवारको विचल्ली हुन पुगेको भन्दैं समाजले ९३ हजार ४ सय ७५ रुपैया आर्थिक सहयोग गरेको हो । पर्वत समाज कतारका केन्द्रिय सदस्य महेन्द्र चालिसेको संयोजकत्वमा रोजगारीको लागि कतारमा रहेका पर्वतेलीहरुबाट उठाएको रकम पीडित गिरीकी श्रीमती जुना गिरीलाई हस्तान्तरण गरिएको हो ।
रकम हस्तान्तरण कार्यक्रममा बोल्दैं कुश्मा नगरपालिका वडा नम्बर ३ का वडा अध्यक्ष तेज प्रसाद पाध्यले खाडीमा पसिना संग साटेको पैसा आफ्नो परिवारको छाक काटेर सहयोग गरेकोमा समाजलाई धन्यवाद व्यक्त गरे । जनताको स्वास्थ्यको सुरक्षा गर्ने दायित्व राज्यको भए पनि अझै त्यो हुन नसकेको अवस्थामा स्थानिय सरकारले सक्दो सहयोग गर्ने प्रतिवद्धता व्यक्त गर्दै आफ्नो वडाबाट दश हजार सहयोग गर्ने समेत बताए ।
सो अवसरमा पर्वत समाज कतारका संस्थापक तथा पुर्व अध्यक्ष प्रताप गिरिले क्यान्सर पीडित गिरीको स्वास्थ्य अवस्था र पारिवारीक अवस्थाको बारेमा जानकारी गराउदैं कठिन परिस्थितिमा कतारमा स्थापना गरिएको संस्थाले आज आफन्नै परिवारलाई राहत हस्तान्तरण गरेकोमा खुशी लागेको बताए ।
राहत हस्तान्तरण कार्यक्रममा संस्थाको बारेमा जानकारी गराउदै पुर्व महासचिव सन्तोष कुमार गुरुङले संस्थाले बिपत तथा अफ्ट्यारोमा परेकाहरुलाई स्थापनाकाल देखि नै सहयोग गर्दै आएको भन्दै आगामी दिनमा पनि निरन्तरता दिने बताए ।
राहत हस्तान्तरण कार्यक्रम पर्वत समाज कतारका सह–कोषाध्यक्ष सोमबहादुर केसीको अध्यक्षता, अनुशासन विभाग प्रमुख याम केसीको स्वागत तथा कतारमा रहेर पत्रकारीता गर्दै आउनुभएका समाजका सदस्य सन्तोष क्षत्रीको सञ्चालनमा सम्पन्न भएको थियो ।
