कमल पौडेल, गल्कोट २०७७ जेठ १८ । गल्कोट नगरपालिकाले वडा नं. ११ रिघाका अध्यक्ष डम्बर श्रीसका पुजनीय पिता स्वर्गिय होम बहादुर श्रीसको ५ औं दिनको पुण्य तिथिको अवसरमा श्रद्धाञ्जली सभाको आयोजना गरि उनको योगदानको स्मरण गर्दै हार्दिक श्रद्धाञ्जली अर्पण गरेको छ ।
सो कार्यक्रममा बोल्दै गल्कोट नगरपालिकाका नगरप्रमुख भरत शर्मा गैरेले सिँगो परिवार नै सामाजिक सेवामा लागेको भन्दै बाबाले सुरु गरेको समाज प्रतिको दायित्वमा सचेत रहने ज्ञान सहकर्मी डम्बर श्रीसमा देखिएको भन्दै स्वर्गिय श्रीसको स्मरण गरे । सामाजिक व्यक्तित्व कम जन्मने भन्दै नगरप्रमुख शर्माले श्रीसको निधनले गल्कोट नगरवासी नै मर्माहत भएको भन्दै डम्बर श्रीस सहित शोकाकुल परिवारजन प्रति गहिरो समबेदना व्यक्त गरे ।
कार्यक्रममा उपनगरप्रमुख रेनुका काउचा, प्रमुख प्रशासकीय अधिकृत शिशिर पौडेल, श्रोत व्यक्ति दिनेश पन्त लगाएतको उपस्थिती रहेको थियो।
त्यस्तै नेपाल राष्ट्रिय शिक्षक संगठन गल्कोट नगरकमिटि अध्यक्ष राम बहादुर खत्री, एकिकृत शिक्षक संगठनका गल्कोट नगर संयोजक चुडामणि शर्माले श्रद्धाञ्जली तथा समवेदना पत्र हस्तान्तरण गरेका थिए ।
शेयर सदस्य डम्बर श्रीसको पिताको निधन भएको भन्दै सिवाईसी बचत तथा ऋण सहकारी संस्थाले राहत सहित समबेदना पत्र हस्तान्तरण गरेको छ भने स्थानिय सामुदायीक बन, सहकारी सहित दर्जन वढि संघ संस्थाले समबेदना व्यक्त गरेका छन्।
पाचौं दिनको पुण्य तिथिमा नेपाली काग्रेस गल्कोट उपसभापति यज्ञ सापकोटा, गल्कोट बहुमुखी क्याम्पसका क्याम्पस प्रमुख देवेन्द्र खत्री, पार्वती माविका पूर्व प्रअ हर्क पाण्डे, रत्नलक्ष्मी माविका पूर्व प्रअ दामोदर शर्मा लगाएत विभिन्न संघ संस्थाका प्रमुख तथा प्रतिनिधिहरुको सहभागिता रहेको थियो ।
पूर्व गाविस अध्यक्ष, प्रधानपञ्च समेत रहेका श्रीसको यहि जेठ १३ गते हृदयघातको कारण ६७ वर्षको उमेरमा निधन भएको थियो।
