कमल पौडेल, गल्कोट २०७७ जेठ १८ । साविक रिघा गाविसका पूर्व अध्यक्ष होम बहादुर श्रीसको पाचौं दिनको पुण्य तिथि शनिवार विभिन्न संघ संस्थाले घरमै पुगेर श्रद्धाञ्जली सभा मार्फत श्रीसलाई सम्झिएका छन्। नेपाल कम्युनिष्ट पार्टी (नेकपा) गल्कोट नगरकमिटि तथा रिघा वडा कमिटिको संयुक्त श्रद्धाञ्जली सभामा बोल्दै नेपाल कम्युनिष्ट पार्टीका प्रदेश कमिटि सदस्य सुनिल शेरचनले सिँगो पार्टीले पश्चिम बागलुङको होनाहार सिपाही गुमाएको बताए ।
शेरचनले व्यवहारमा नैतिकता र विचारमा प्रष्टता भएको व्यक्ति भन्दै होम बहादुरको उत्तराधिकारीको रुपमा वडा अध्यक्ष डम्बर श्रीस हिँडेको बताए ।
कार्यक्रममा नेकपा जिल्ला कार्यालय सदस्य विष्णु प्रसाद भुसालले स्वर्गिय श्रीस त्याग र समर्पणको ज्वलन्त उदाहरण भन्दै स्मरण गरेका थिए । स्वर्गिय श्रीस रिघा गाविसको उपाध्यक्ष हुँदा गाविस अध्यक्ष रहेका बाबुराम नेपालीले सामाजिक निष्ठा सहित अग्रसर भई सामाजिक भलाइमा लाग्नु नै श्रीस प्रतिको सम्मान हुने बताए । त्यस्तै स्वर्गिय श्रीस रिघा गाविस अध्यक्ष हुँदा उपाध्यक्ष रहेका नेकपा जिल्ला कमिटि सदस्य गंगा भुजेलले श्रीसको योगदानको चर्चा गरे ।
सो कार्यक्रम नेपाल कम्युनिष्ट पार्टी (नेकपा) गल्कोट नगरकमिटिका अध्यक्ष ललित श्रीसको अध्यक्षता तथा रिघा वडा कमिटि अध्यक्ष श्याम विकको संचालनमा सम्पन्न भएको थियो। कार्यक्रममा नेपाल कम्युनिष्ट पार्टी (नेकपा) का प्रदेश कमिटि सदस्य प्रेम खरेल, जिल्ला कार्यालय सदस्य लाल बहादुर थापा लगाएत जिल्ला तथा स्थानिय स्तरका नेता कार्यकर्ताहरुको सहभागिता रहेको थियो।
